Mach das Radio an - dat maak ik nu al siet Johr un Dag nich mehr, aver hüüt mußt ik de gude Naricht höchstpersönlig geneten - School fallt ut in ganz SH, nu gifft sogor de een un anner Grad Minus. Radio, as wi dat kennt hebben, gifft sodennig nich mehr oder doch op: Op Cd. Heff ik lehnt kregen: Ool Stimm Bob stellt för sien Radio-Hour-Programm.Groff, wat he för Leeder kennt, dor heff ik noch to hören. Hett dat ja uk bi uns mol geven, een Tiet, wo to de beste Radiostünn een schöne Radiostimm Musik vörstellt hett, de Du noch nich kennen däast un wi seeten mit de eene Hand an'n Knoop vun't Tonband un nähmen op, wat se dor villicht uk blots eenmol späälten.Vergliek dat mol mit hüüt. Mien Hass-Leed op RSH is leider op düütsch, dat warr'k hier nich los. Wo dat nu aver um un bi Klock söben is, wi dat Blitzies aftöven dörvn, will'k versöken, mien tweete Leed vun güstern ut't lüttje Book ruut to kiddeln, dor geiht um de Wege, de ik geeng. De erste weer nich wiet, na'n Fenn, wo een, twee Melkkeuh stunnen un ik mit'n lütte Kann 'n beten Melk halen schull, dat geev Melksupp achteran, mit Huut un- dat kann ik mi nu gor nich mehr vörstellen - dat eff ik eten.
Wat för Wege in mien Leven bün ik gahn?
Seh se vun wiet weg, blief 'n beten stahn.
Wat för Wege weern't, wohen hebben se mi föhrt?
Na Hüser un na Minschen, heff'k de Naam lang nich mehr höört.
Mit Melkkann, Gummisteveln röver na de Fenn
haalt Mudder 'n beten Melk för um un bi so fofftig Penn
geeng un keek, wo Willy't maakt dat strippstrappstrull
weer Frieda dor, denn weer mien Kann meist nich so vull.
An'n Sündag hen na Kark, de Kinder an de Reeg.
För Vadder dä't nich nödig, dat ik na de Paster leep.
Hörte de Geschichten, kreeg'n Heft un een lütt Büld.
Freut mi an, wat Baaskeerl Jesus dä för de Lüüd in siene Welt.
Över de Straat de Nahwerjunges, Frünne - weern se dat?
Ehr Mudder in de Köök, bi Fiete-Buer Hund un Katt.
Striet un Aventüer - vun beide liekeveel
An't Ehrenmal in't Holt Cowboy un Indianer späält.
Op Süden steiht de Bude, wo dat Sahnebunjen gifft
un ach, noch so veel Feines, wenn du dör't lütt Finster kiekst.
Kannst Di all nich kopen, hest blots'n Gruschen in Dien Fuust.
Wenn Glück hest, kriggst vun Vadder eenmol we'r een Wundertuut.
Över de Herrendiek stappst Du nu langs na School.
Rechterhand dor geiht de Weg na't Kinnerheim diekdal.
Ool Jehann-Eventuell steiht un töövt we'r op dien Moin
bi de Meierie, de Melkwaag mit de Peerd jüst bi to dreihen.
Ruut na Süderhaven, dor schallst Du swemmen lehren.
Hett di man nich lückt, blots de annern baden geern.
Steihst op de Diek to kieken, wo de annern juxen un sik freuen.
Büst wedder butenvör un kannst na Huus utneihen.
De lange Weg na't Hörn, de fohrst Sündag mit dien Ool.
De Schippers, all de Mannslüüd, dor föhlt een Jung sik wohl.
Höörst de Snack un dat Vertellen, dat Swögen um de Wiede Blick
uk wenn de een un anner Oogen pharisäerglönig kiekt.
Op't Rad fohrst över England un Elisabeth-Sophien
gau mol röverkieken, an Dörtes Hoff vörbi.
Hen weer mit de Wind, nu peddst Du swoor torüch.
Egentlig weer't umsunst, man geneten kannst den Weg.
Över de Damm geiht mit de Bus hen na Herman-Tast.
Weetst as lüttje Jung, wat Du na hoghe School hen schallst.
Op de ZOB lehrst Du dat Töven un dat Scharsen op de Fohrt
mit Rudi un mit Ewald. Mudder töövt al in de Poort.
Na Kiel fohrst mit de Zug, denn dor schallst nu wat studeeren.
Mit Vadder sien Ascona eenmol hen wegen een Deern.
Mit Broer we'r torüch na dat Öllernsorgenland.
Achterbahn fohren dien Gedanken, kummst Du runter vun de Damm.
Na't oole, stolte Lübeck un sik Geld dor verdeenen.
Vun de Diek nu meist to wiet, um hier un dor to ween.
N'Heimat heff ik nich, man ik weet , wohen ik höör
een Land, wat dat mol geev, dorvun tüügen disse Wöer.
Wat för Wege bün ik gahn?
Warrn de olen Hüser all noch stahn?
Kunn'k de olen Straten noch langs fohren
vun Osterdiek na Süden un na Noorn.
T.u.M.V.I.
