Bleib bei Dir - dat wurr mi mol mit een liesen Stimm bedüüd, un dor is ja uk wat an, denn af un to ritt mi dat denn mit, dat Geföhl, ik schull een anner helpen, de dor benaut kieken deit un wo dat Lück jüst nich jedeen Dag an de Döör pingeln deit. Aver wo schull dat gahn, muttst ja tosehen, wat du sülven engermaten dorvun af kummst, un nich to Mallöör kummst an een Sünnschiendag oder di verbuddeln deist bi Rägen. Is uk man blots een Leed för eenen Dag, för een Klick, de uk so gau we'r na en anner Siet gahn kann un denn is vun hier ut vergetten. Uk wenn se natürlig recht hebben un meenen, keen lütte Klick in disse grote wiete Internet-Loh wurr vergetten. Big Brother warrt uns sach een Dag betahlen laten, so as se dat ja acta-mäßig vörhebben. Bün uk ümmer so'n beten hen un her, wat ik dat hier bibeholen schull, wurr de letzten Dage vun so'n Cash-Maschin anklickt, hool op, wat will de vun mi. Mit plattdüütsche Leeder kannst keen cash mehr maken. Bild ik mi wengst in. De lütt Fru in dat Leed sehg ik bi "Netto" an de Kass; harr een ernste Gesicht, weer keen Freud in to sehen; Fru köfft sik een Pizza un bet Smook för den Avend. Bild mi in, weer een vun de velen Dusend Fruens, düchtig, verdeent sik een beten Geld to'n Bispill bi de Pudels, Schichtdeenst un keen Utsicht op een schöne Avend, villicht ja uk vör ehren Cumputer, sik een Minschen söken. Dor muchst ehr blots Glück to wünschen. Kunn egentlig biblieven un schrieven disse Oort vun Leeder, man bün in'n Momang wat mööd un traag un mag den Bliefer nich in de Hand nähmen.
Een Fru mit trurig Ogen
stunn dor an de Kass
sühst in ehr Gesicht de Sorgen
vun allens, wat nich paßt.
De Fru mit trurig Ogen
seggt uk nich een Woord
magst dat sülvst nich wagen
dor is se al ut de Poort.
De Fru mit trurig Ogen
fohrt in ehren Waag vörbi
is denn uk glieks afbagen
fohrt nich in de Richt vun mi.
De Fru mit trurig Ogen
schall ik nich weddersehen
uk wenn ehr trurig Ogen
mi noch lan nageengen.
Kann ehr all nich helpen
gahn ehren egen Weg
dör't Leven.
Mötten al tosehen
un kamen mit trecht
mit't Leven.
Söök noch sülvst den Weg
dör't Leven.
Keem lang nich dormit trecht
mit't Leven.
De Fru mit trurig Ogen
is nu al lang to Huus
is dor noch an't Wogen
villicht geiht se hüüt noch ut.
De Fru mit trurig Ogen
dor's een Deel, wat ik ehr wünsch
se harr een Grund to smustern
an't besten weer een Minsch.
T.u.M.V.I.
