Dekonstruiere Dein Feindbild - dat bün ja ik, op de ik dor inslaan do, dor mußt uk erstmol op kamen; heff'k erst so richtig lehrt, as ik de Rääd lääst heff, wat de Präsident vun Israel in'n Bundestag holen hett: dor sä he, dat he mit Moses vun Ägypten losgahn weer, dat he dor an de Ramp vun Auschwitz stahn harr, dor keem mi dat an, dat ik denn ja uk an de Ramp stahn harr, man op de anner Siet, wo ik nie stahn wull un wo Mengele stunn. Felix Droese hett dat ja in een groten Scherenschnitt utdrückt: ich habe Anne Frank umgebracht. Man dat geiht ja uk een Nummer lüttjer: so full mi disse Leed in, as ik na Hamborg fohren dä un een Keerl mit'n scheußlig Fahn achter mi seet un stunk, weer knapp uttoholen; man dor dach ik, dat kunnst du ja uk ween, Ipe, hest uk wat vun faat, hest Lück, wat Du de Minschen nich so to Last fallen deist un Dien schöne Leven verdeist oder doch? Hest sach'n beten mehr Lück hatt, wat Du dor nich mit ünnergahn büst in de Pharisäer-Flaag, wo't Grog un Punsch un Tisserand un Underberg geev "ohne Ende", as mien Football-Kolleeg Klaus ümmer seggt. Gah an de Buddel-Regalen vörbi un freu mi an dat Geld, wat ik sporen do, man heff in anner Regalen rinlangt un dat nich to knapp.
De ole Keerl is jüst so oolt as ik
sitt dor mit de Buddel in de Eck.
He is al tämlig vull.
Bramien stinkt ganz dull.
He kreeg sien Buddel Beer un dat späält för em keen Rull.
De ole Keerl, wat harr he för een Leven?
Wat hett em lockt un na den Bramien dreven?
Wo lang he wull al süppt?
Fung he an, dor weer he lütt?
Oder is dor een Kummer, de noch ümmer an em fritt.
Beer un Bramien, laat dat Schiet lever stahn.
Schullst mit apen Ogen dör dat Leven gahn.
Beer un Bramien, hest al noog vun hatt
de schöne Tiet vun't Leven för de Katt.
De Keerl dor is een Minsch so as ik.
Uk vun een as em heff ik een Stück.
Uk wenn't nich jedeen süht
bün vun em nich mol so wiet
jüst as ganz veel anner Lüüd.
De Keerl dor hett uk wat vun mi.
Dorvun is keen een vun frie:
Wi söken een lütt Stück
wi söken een lütt Stück
vun't grote Lück, vun't grote Lück.
Beer un Bramien, laat dat Schiet lever stahn.
Schullst mit apen Ogen dör dat Leven gahn.
Beer un Bramien hest Du al noog hatt.
De schöne Tiet vun't Leven för de Katt.
De Minsch, he maakt sien Ogen to.
Sien Bramien-Brägen is anners wo.
Villicht wo't hell in't Dustern is
uk wenn nix to smustern is
uk wenn't een falsche Freden is, dat's wiß.
De Keerl, ik wünsch em noch veel Lück
dat he noch schafft een gude Stück.
De Bramien an em tehrt
wo he sik toletz verleert
ach, harr dat Leven doch'n beten Wert.
Beer un Bramien, laat dat Schiet lever stahn.
Schullst mit apen Ogen dör dat Leven gahn.
Beer un Bramien hest Du al noog hatt.
De schöne Tiet vun't Leven för de Katt.
T.u.M. V.I.
