Ziele - dat weer een vun de Wöer, wo sik dat hüüt um dreiht hett, as wi Frünne tosamen seeten in't Lokaal, wo wi uns na de Dodenfier verhaalt hebben. Mag an't Öller liggen, wat wi nu hebben, aver egentlig geeng't för de mehrsten dorum, sik mit dat Leven to arrangeeren, mittonähmen, wat dat Leven noch gifft un sik sülvst op den Weg na't Lück nich de Knippel mang de Beene to smieten. Wengst in mien plattdüütsche Leven heff ik nu mit disse Blog een Weg funnen, de mi in de Gang höllt, uk wenn de Plaan, Dusend un een Leeders rintostellen wiet över all dat weggeiht, wat een trechtkriegen kann. Dat weer een gewaltig Freud, as ik de fründligen Wöer lääst heff, de Volker Holm över mien lütt Blog hier funnen hett; he hett uns dat je vörmaakt, wo guud dat de plattdüütsche Saak to Gesicht steiht, wenn se ut den "Nahbereich" ruutdragen warrt. Dorto harr ik leider wenig Talent, bün ja mehr so'n Binnendieks-Muskant bleven, aver mit't Internet kann ik ja wengst so doon, dat ik noch 'n beten wedder guudmaken will.
Dusend Leeder wull ik singen.
Dusend Leeder wull ik schrieven.
Dusend Leeder wull ik singen
vun de Schadden- un de Sünnschientieden.
Vun mien erste weet ik noch de Wöer
geeng mi gau vun de Hand.
Sung vun een lütt smucke Deern
to'n Bispill vun de Waterkant.
Mien tweete, weet gor nich worum
geeng't um een Frisörsalon.
August-Moritz klippt dat Hoor
vun Otto Tüter un Hans Lord.
Dusend Leeder ....
Riemelt mi gau wat torecht
meist nie ganz lang överleggt
geeng toerst veel um "afstääd"
un dornah keem "deit mi leed".
In Gedanken um mien Insel gahn
glieks harr ik een poor Reegen stahn
vun Thekla un vun Gisela
vun Amanda un Frieda.
Dusend Leeder...
Wo't keem, weet ik bit hüüt noch nich.
Wat güstern weer, leeg wiet torüch.
De ole Charme, de geeng perdü
't wurr ganz düster hier bi mi.
In de Kummerkamerjohrenmusik
geeng't ümmer blots um ik, ik, ik.
Wull de Minschheit nich mit stören
wöllt all fröhlig Singsang hören.
Dusend Leeder...
Midlerwiel is't gor to licht
'n Ogenblick för een Gedicht.
Mehrsdeels blots för mi alleen
maak ik een Leed vun 1001.
Dusend Leeder will ik singen
Dusend Leeder will ik schrieven
Dusend Leeder will ik singen
vun de Schadden- un de Sünnschientieden.
T.u.M.V.I.
.
