alle Neune - negen weern wi bi de Afstimmen, de kümmerlig Rest vun de, de de hoghe School noch as een Negen-Johr-School torüchwullen, dor weern twee ole Mackers bi - een dorvun weer ik - un de Fruuns, de Kinner hebben un weten, wat de G-8-mäßig utholen mötten. Dat helpt allens nix, de Mehrheit weer sik eenig, G8 is dat Hüüt un Morgen, un wenn Du dor noch lang gegenan geihst, denn warrn de Wöer ümmer leeger, ännern nix un bringen blots Gift op. Aver leeg weer't liekers un ümmer wenn't so'n scheußlig lang Palaver geb
ven hett, is de Nach achteran dorna un vun Klock twee an in de Morgen heff'k waken lägen un versöcht, dat Gift wer ut'e Kopp ruut to wöltern. Wat de Riemelmaschin dorbi utbottert hett, gefallt mi nich. Dorum heff ik mank de velen Bläder wöhlt, de hier un dor rumliggen un een Leed utsöcht, wat um un bi 5 Johr oolt is, musikmäßig noch nich ut de Kopp fullen is, aver wat ik sach nie mehr vör de Lüüd singen warr. To mien Leeder hören nu mol ganz velen, de sünd egenlig nich veel anners as'n Sermon, de Du Di sülven vörsingen deist, dat Du we'r ruut kummst ut dat Gruvel-Karussel.
Een Grund to schriegen is dat nich
de olen Tieden, dat ole Licht
dat Di mol schient hett un warmen dä
is nix vun bleven, so as ik dat seh.
Een Grund to truern is't villicht
kannst blots duern
weil't so wiet liggt
kannst blots besinnen
gifft keen Torüch
kannst nix in finden
vun't ole Lüch.
Keen Grund to prahlen, wat Du mol harrst
sik schön to malen. holen sik för Narr.
De düster Placken. de nüms geern süht
noog an de Hacken, de "gude, ole Tiet".
N'Grund to vergeten, mehr as een
nix mehr vun weten, nix hören un nix sehen.
Harrst Du keen Güstern, harrst uk keen Hüüt
geev keen vörut, de Weg na Morgen weer to wiet.
T.u.M. V.I.
