Krötig - dat weer ik hüüt, un ik weet uk, worum. Dat Jachtern un keen beten Ruh finden, un dat den ganzen leeven, langen Dag. Alleen to'n Bispill, ik schull noch Böker afhalen, de ik nich bruuk, de een geern los ween will, fein, aver ik harr noch nich mol Tiet un ropen torüch. De Wiehnachtspost "mit fliegender Feder", dat hett sodennig ja uk keen Oort. Annern schrieven dor so'n Rundbreef; aver ik laat dat denn eenfach so op't Papier lopen, wat ik de annern wünsch. Man jammern wöllt wi nich. De Wiehnachtsmusik vundag weer schön, Chorstücken klungen herrlig kloor dör de Scheperkark St.Jacobi, un ik seet in de letzte Reeg un kreeg gor nich mit, wo unruhig dat weer. Nu is de Dag vörbi, de vulle Maand, de mi um Klock süss direktemang in't Gesicht schienen dä, hett em regeert. .Dat hiere Leed is een vun de doren, de ik för dat Adventssingen in Obernwohld kumpeneert heff - kunn ja bald uk een Wiehnachtsplatte ruutgeven, wenn mi man blots uk so een "Last Christmas I gävv ju my hart, but the very next day you gävv ik away" infallen wurr.
Een poor Dage noch
se seggen, denn is't so wiet.
Man dat Wiehnachten is
för mi is't noch so wiet.
Harr meist gor keen Chanx
mi sülven to finnen
för een Ogenblick na binnen.
Een poor Dage noch
un se hebben all dat trecht.
Packt all ehr Geschenken
de se annern bröcht.
Harr gor Chanx
na Stadt wat to sehen
denken sik in een anner een.
Wat is dat schaad
hest för Wiehnachten keen Tiet.
Wat is dat schaad
is dor blots Jachtern, Jagen, Striet.
Wat weer dat schaad, weer dat to laat
för een lüttje Stünn
kannst Du Wiehnachten in finnen.
Een poor Dage noch
un to Enne is dat Johr.
Wo sünd de Wünsche bleven
wat dorvun wurr wohr.
Ik harr gor keen Chanx
un sehen, wat noch blifft
vun wat'k mi vörnahmen harr
un wat't noch gifft.
Wat is dat schaad
hest för Wiehnachten keen Tiet.
Wat is dat schaad
is dor blots Jachtern, Jagen, Striet.
Wat weer dat schaad, weer dat to laat
för een lüttje Stünn
kannst Du Wiehnachten in finnen.
T.u.M.V.I.
