La lune croissant - de Sichelmaand, hett een vun mien Schoolmeisterschen ut Frankriech vör'n poor Daag seggt, as wi de Maand över de Toorns vun de Giebelstadt gewohr wurrn; de Maand is midlerwiel half vull, aver de Sichelmaand, de heff ik doch mol in een Leed hatt, dat is al sooo oolt, un heff ik leider binah nie vör Minschen späält.Weer uk so, wat mien Ex Nummer Een dor richtig'n beten suertöppsch weer, as ik vun de Avend vertellte, wo wi in Vadder sien Garag' uns Panama-Red-Musik öövt hebben un een vun de Junges neihte gau ut mit sien gröne Fiat 850 un keem na'n gude Stünn mit rode Backen un glönig Oogen torüch. Wat weer dor passeert? Naja, eenmol hupen un denn weer de Schöne al ruut ut't Huus kamen för so'n lütte Tour vun'n Höhnerdiek na de Marsch. Wi Muskanten leeten uns dat so'n beten vertellen, un dat maakt mien Ex giftig, wat dor vun uns Keerls över snackt wurr un wi de arme Deern dor nu hernähmen, wo nu keen anner een wat vun de söten Stünnen wat weten schull. Un ik maakte dor sogor noch'n Leed vun. Aver ik bün dat ja nich ween, un in mien Leed kummt dor ja uk nich veel na. Mit mien Rixe-Rad kunn ik ja nu överhaupt keen söte Deern vör de Döör locken. De gröne 850er Fiat hett leider keen lange Leven mehr hatt, een vun de söten Stünnen weer binah tragisch wurrn, aver dorvun fang ik nu nich uk noch an.
Över de Feller, över de Straten
schient de blanke Sichelmaand.
In mein Waag, dor is dat warm
un Du weetst, wat sik dat lohnt.
Un Dien Öllern, ja, se slapen
un se sünd al lang to Bett.
Dat Licht geiht u-ut
un Du kummst ru -ut.
Dat Licht geiht u-ut
un Du kummst ruut.
Mien Frünne dörven nich weten
wat ik hüüt avend do.
Nie kunn ik dat vergetten
un ik bün ja uk so froh.
Denn ik denk de ganze Dag
man ümmerto an disse Nach.
Dat Licht geiht u-ut
un Du kummst ru -ut.
Dat Licht geiht u-ut
un Du kummst ruut.
Höörst Du mi nich hupen?
Ik stah buten vör Dien Döör.
Nu al so veel Minuten?
Segg, hett dor wat mallöört.
Ik fohr al siet twee Stünnen
um Dien Huus herum.
Segg mi, wat is denn passeert?
Worum wullt Du denn nich kamen?
Güstern weer dat nich so dull
man wi probeeren dat hüüt noch mol.
Dat Licht geiht u-ut
un Du kummst ru -ut.
Dat Licht geiht u-ut
un Du kummst ruut.
Naemi, ik tööv vör Dien Huus.
T.u.M.V.I.
