Ipsen, dat weer Pornographie - dunnert Hans-Georg P. mi an, as he dat Stück "Fa" vun Gerd SP hört harr, wo de vun sien Janimann vertellte, de bi "Fa" an een Fru ganz ut de Tuut is. Oha, dach ik, dor heff ik al wat anners in de Hand un vör Oogen hatt as SP sien lütt Kavaleersdelikt "Kiek mol'n beten to", een lütt un fien un diskreet lütt Book, dat leep denn ja uk op "vergriffen" ruut. Man ik bün ja mehr för "Lux" un de Rook, de mi siet Johr un Dag in Gedanken dör de Nääs geeng, dat weer een Mischung twischen Chanel Nummer Fief un Roth-Händle. Blots - Ödipussi hen un her- mit 4711 will'k nix mehr to doon hebben. Man dat Rüken, wo kann't angahn, dor geiht ja nu rein binah nix över, un dat seggt een, de mol "Optiker" nöömt wurr.Tja un nu bruuk ik al lang een Brill un de Ohren hören uk blots noch, wat se wöllt, wenn man blots dat Rüken nich nalett...
Wo schön, dat Du nich weetst
wo geern ik ümmer na Di leep
gau vörbi un gah Di achteran
wat ik nich 'n beten vun Di rüken kann.
Wurr geern weten, wo se heet
wo ik ehr so geern mag, Dien Seep
köfft se bi de Koopmann achteran
dat ik 'n bet wat vun Di rüken kann.
Ik weet, ik weet, ik schull't nich doon
man in de Nääs so'n beten Seep wat is dat schon.
Ik weet, ik weet, dat is uk nich ganz fein
stell mi vör, ik weer de Seep un maakt Di rein.
Kenn Dien Huut vun baben bit na nerren
vun de Nack, an de Knee un in de Merren.
Weer de Seep, Du harrst mi in Dien Hand
man weer blots Schuum in't Water achteran.
Ach, so'n Dag in't Büro weer keef
wenn'k Di nich af un to mol dreep.
Gau vörbi un gah Di achteran
dat ik 'n beten vun Di rüken kann.
Wat weer dat, wenn ik bi Di seet
denn keem ik sach ganz gau in de Sweet
weer beswiemelt un benüsselt achteran
wenn ik toveel vun Di rüken kann.
Ik weet, ik weet, ik schull't nich doon
man in de Nääs so'n beten Seep, wat is at schon.
Ik weet, ik weet, dat is uk nich ganz fein
stell mi vör. ik weer de Seep un maak Di rein.
T.u.M.V.I.
