Kommunikation - wenn een dat sehen wurr, wo't bi mi utsüht, wo't in mien binnen utsüht un wat ik hier allens opstell, an't besten 4,5 Saken op eenmol. Aver alleen de Umstand, dat ik hier nu sitt un op't Cumputer-Klaveer hauen do, dor kannst ja al an sehen, wat een nödig hett. Wenn Du schon mit nüms snacken kannst, denn mutt irgendwie wat un wodennig uk ümmer ruut in de Welt schickt warrn. Weer we'r een Vörwiehnachtsarger oplopen un geeng uk we'r um dat ümmer to wenig an Kommunikation. Noch mehr to snacken, to diskereeren un to doon. Dat Talliglicht, wat ik mi hüüt morgen sülvst anmaakt heff, is Ursaak för disse lütte Leed hier wurrn. Dor is all dat binnen, wat mien Leven regeert, dat Alleenigween, de Truer, aver uk de Leev. Heff egentlig dat lüttje Video mit een Talliglicht hochladen wullt, wat ik vun disse lütte Leed hüüt morgen maakt heff; kreeg aver dat Büld nich dreiht. Woveel mutt ik noch bi all de Technik lehren. Dorum schriev ik nu doch blots we'r de Wöer op. Hett so'n beten wat vun een vun Al Stewart sien Leeder, de Year-of-the-Cat-Musikus. Em hett binah jedereen vergetten, aver de Töne leepen so langs de Klaveer-Tasten. He warrt mi dat nasehen.
Maak dat Talliglicht an
warrt'n Stünn lang brennen.
Is man blots een lütt Flamm
kannst dat Leven in kennen.
Gifft beten Licht un is warm
Tallig sik vertehrt.
Eenmol kummt de Ogenblick an
vun de an lücht nich mehr.
Maak dat Talliglicht an
föhl mi nich alleen.
Lütte Licht's in de Gang
kiek ik ümmer hen...
Dat Töven un Luern
hett mit mol een Richt.
Gedenken un Truer
gahn all rin in't Licht.
Maak dat Talliglicht an
as Du deist vör de Leev.
Licht reckt, wenn ik Di
in mien Armen heff.
För dat Drömen in Dien Arm
warrt dat nich mehr bruukt.
Ehrer de Slaap uns still umfaat
maakt wi't lever ut.
T.u.M. V.I:
