Sonntag, 19. Dezember 2010

Jung weer ik uk

wie vieles auf der Welt - dat sä de Jungkeerl to'n Höker op'n Flohmarkt güstern, as de Höker em sä, de Brill, de he jüst dalleggt harr, de weer so wat vun oolt, de weer öller as he, de junge Mann. Wie vieles auf der Welt, aver uk wo veelen sünd öller as he un doon sik dick dormit, nähmen em villicht uk af un to de Luft un ruineeren sien jungen Johren (Ik segg man blots "Bologna"). So'n grootorige Verdeenst is dat nich, wenn Saken un Minschen oolt wurrn sünd. Oolt weern uk de Fender-Verstärkers in den Laden an't Millerntor, wo ik vörher weer. Dor weern de jungen Verköpers baff, as ik ehr vertellte , wat ik binah mol'n roden Fender harr kopen kunnt, dat heet mien Vadder, aver de Hannel hett nich klappt. Student, di ik weer, harr uk keen Geld, sunst harr'k dor noch'n poor D-Mark dortoleggen kunnt un wurr mi hüüt över wat weet ik wo dull över dat gude Stück freuen. Dat ik in de Laden uk we'r mit mien Jung prahlt heff, de sik för Jack White vun de White Stripes interesseert, harr sach uk nich nödig daan, aver so'n beten stolt kann ik doch ween, denn mien Kinner könen ehr Instrumenten midlerwiel beter spälen, as ik dat je lehrt heff. Oolt warrn is keen Verdeenst, aver de olen Saken in Ehren holen schon. Un woveel een ut dat Oole ruuttrecken kann, dor is de Musik vun Jack White een gude Bispill. Hett uns beiden, mien' Jung un sien Leedermaker-Vadder groten Indruck maakt, as wi em seghen, as Jack sik ut Holt un Wier in de Film "It may get loud" een Gitarr buen dä.

Bi den Höker op den Disch de ole Kraam
junge Lüde, de seh ik dorvör stahn
kieken hen un her
de een wat utprobeert
dor de gäle Brill
wat he dor mit sehen will.

De is oolt, seggt de Höker
so veel öller as Du
as so veel in disse Welt
seggt de Jung un wat seggst Du?

Dat bün ik uk
heff so veel sehen
so veel grote Namens
de keemen un geengen
de oolt is dat bün ik
uk wenn'k nich glöven kann
ja, dat weer ik uk, so as Du een junge Mann.


In de Stadt
wo de jungen Lüde wahnen
in de Laden mit ganz veel Kraam
loop ik hen un her
wat dor wat för mi weer
de Hoot, de Jack, de Schoh, de Büx
man wat'n Farv,  dat is'n Witz.

De is nieg seggt de Höker
un dat heet för junge Lüüd
as so veel in disse Welt
un dat siet een lange Tiet.

Man jung weer ik uk
harrst mi domols sehen
dat weern niege Bahnen
de wi keemen, de wi geengen.
Jung dat weer ik uk
uk wenn'k dat nich mehr glöven kann
ja, ik weer uk so as Du een junge Mann.


T.u.M.V.I.