Aura- na- wat wurr een op platt wull dorto seggen? Kaam dor jüst op, wo ik so'n lütte halve Stünn we'r een vun de Sendungen sehen heff, wo't um Künstlers geiht. Weer een ganz een feinen Minschen, de heet Saul Leiter un hett Biller maakt mit Farv un gor nich mol ümmer scharp aver dor weer soveel in binnen, dor mußt Du ümmer we'r na kieken. Dat Büld, wat ik hier meenen kann, dat lüttje Bild vun ehr -na - 'n Künstler hett't nich schaten, aver een gude Minsch, de villicht ahnt hett, wat he de beiden dor de lütte Sünnschien-Ogenblick gönnen schull, de ik in dat hiere Leed dördeklineert heff. 'n Viddeljohr lang weer mien Leven as' n Fülm ut Frankriech, in de't um nix anners geiht as Leev, de läävt warrn kann un denn een anner Leev, wo't nich geiht.Ut so'n Dree-Eck kummst nich ohn Antostötten ruut, dat Wehdoon, sünnerli vun de, de nablifft, dünkt mi, hört dor denn wull to, jüst as dat slech Geweten bi mi. In de Reeg bringen kannst nix mehr, man allens in Dien Leven un in dat Erinnern verwohren.
Güstern harr'k dat lüttje Büld vun ehr
mol wedder in de Hand
bekeek mi dat ganz lang
un dacht
wo mag ehr dat wull gahn.
Ik sitt neben ehr.
Se kiekt jüst in't Blatt.
Ik vertell ehr wat.
Se lacht.
Wo mag ehr dat woll gahn?
Dat Büld, dat weer ganz wiet vör
ik bi ehr weer ganz neeg
un se bi mi leeg
ganz sacht.
Wo mag ehr dat wull gahn?
Un wat weer'k verrückt na ehr
fohrte een poor Stünnen
dat ik gau mol bi ehr bün
de Nacht.
Wo mag ehr dat wull gahn?
Wo mag ehr dat wull gahn?
Dat lüttje Büld vun ehr
is allens, wat ik heff
is allens, wat mi bleef
vundag.
Wo mag ehr dat wull gahn?
Wo mag ehr dat wull gahn?
T.u.M. V.I.
