Geschäftsüberhäufung - Kinner, wat Düütsch so allens kann. Dat Woord hett mi noch fählt in mien Privat-Lexikun. Heff't jüst lääst, as ik in'n Mensing nakkieken wull, wo "hild" denn herkamen deit. Weet "he" uk nich, is ja uk ennerlei. Is'n schöne Woord, uk wenn dat "ik heff dat scheußlig hild" egentlig uk scheußlig is; un so is dat nu, bün we'r in de Sweet kamen bi dat Hen un Her vun mien Leven, wo dat ümmer so'n beten na "Landünner" utsehen deit. To de beiden Schoolmeisterschen ut Frankriech, de mi nu de ganze Dag in de Draav beläävt hebben, meent ik blots, le cas est désespéré - un se wussen uk glieks, wat ik meent, keen Fru bruukt sik in disse Leven mit "Erziehungsaufgaben" an mi to vertehren, lever versöken un holen dat ut. Wenn'k man blots de Wöer finden kunn vun mien lütte Singsang vun de "Oppassung", de wurr hier guud henhören. Een Oppassung is ja dat, wat een Mann bruukt un nie de Fru als Solches. Wenn't uk sunst keen Grund geev, sik tosamenschrieven to laten, de Oppassung is för een Öfo(överfofftig) dat egentlige A un O.
Nu bün ik aver wiet afkamen, aver vun de Hildigkeit an disse Dag will ik gor nich lang snacken, aver worum nu nich blots de Waag in de Warkstä steiht, man uk twee vun mien ole Fohrröders twei sünd, dat verdüütsch mi mol. Mutt glieks we'r ruut in de Küll un halen vun'n Wiehnachtsmarkt dat ole Rad för die Dame. Un hier so'n lütte Leed för die Dame un uk de annern all glieks op to.
Ik schudder un wurr koolt
leep to gau, dat weet ik wull
harr dat hild
harr dat hild
denn ik wull ja hen na Di.
Nu freu ik mi al op Dien Stuuv
noch teihn Minuten na Dien Huus
heff dat hild
heff dat hild
denn ik will ja hen na Di.
Un ik glööv
dat Du töövst
dat is, wo ik mi an höög.
Wat so is
dat is wiß
weil Du mien Allerbeste büst.
Um mi rum, de anner Lüüd
ehr egen Welt, ehr egen Tiet.
Hebben't uk hild
hebben't uk hild
weil jedereen wat för sik will.
Gönn ehr wat, dat se dat finden
een Lust as in mien Hart hier binnen.
heff dat hild
heff dat hild
denn ik will ja hen na Di.
Heff dat hild
heff dat hild
denn ik will ja hen na Di.
T.u.M.V.I..
