Das Nichten des Nichts - wat dat vörstellen deit, weten man uk blots'n ganze poor Minschen, de kannst uk fragen, wat se Opa Schulz noch kennt hebben un wat se sunst noch weten vun't Philosophicum vun vör ik weet nich woveel Johren. Sartre weer nämlig hüüt an de Reeg; mien lütt Deern hett sik as Kaffestünn-Programm een Rühmann-Film utsöcht; Max der Taschendieb, Chott, dat beten Klaun, Klaun,Klaun wurr binah to'n Ikbündatwatikutmimaak-Drama, de Minsch wurr sodennig över dat bestimmen, wat he dä un dormit weer. FSK meente, de Film weer af süss, aver dor harr ik lever "af 12" op schreven, denn dat geeng doch in den Film um veele Minschenleven 'n beten dramatisch to Kehr, harr aver uk de Momenten, wo mien lütt Deern lachen kunn.Un laat Rühmann ween hebben, wat he weer, de Kinner mögen em, dat weet ik al vun mien Patenkind, de Rühmann-Stimm un dat Rühmann-Grienen, dor harr se so'n Oort Ganzvertruun to. Nu is mien lütt Dochter al lang to Bett. Schlafbesuch - heet dat ja in't Kinnerdüütsch. Un vör't Slapen noch ganz veel Fragens stellt un wichtig snackt. To all ehr Fragens kunn ik nich veel seggen, denn worum dat in ehr bit nu korte Schooltiet nu al tweemol um "die Liebe" gahn weer, dor wußt ik natürlig uk nich veel vun af. Dorbi hebben uns de jungen Lüüd, de wi mit uns Uttuusch-Programm tosamenklöppelt hebben, düchtig wiest, wo dat hüüt geiht. So schaneerlig as in dat hiere Leed sünd se vundag nich mehr. Gifft doch gor keen Grund mehr ruuttogahn.
Kaam man mit, mien söte Deern
denn vun mi kannst Du wat lehren
ik segg Di dat ganz liesen
ik much Di geern wat wiesen.
Eerst mött wi na buten gahn
dat kannst Du doch licht verstahn.
Sünd wi eerst in't Dustern
kannst Du beter luustern.
Eerst'n beten neegher
Hand 'n beten högher
un so'n beten eien
un nich glieks utneihen.
Un denn uk een poor Söten
hier un dor een beten
Un sik dull umfaten
sik denn drieven laten.
Hierhen, dorhen griepen
sik'n beten bieten
sik mank'nanner wöhlen
sik herrlig dorbi föhlen.
Denn 'n beten töven
denken, wat wi flegen.
Sünd wi we'r bi Sinnen -
gaht wi we'r na binnen.
T.u.M. V.I.
